Москвада жөө жүрүүчүлөрдү сүзүп кеткен Чыңгыз Анарбек уулу акталды

Москвада жөө жүрүүчүлөрдү сүзүп кеткен Чыңгыз Анарбек уулу акталды. Мындай чечимди бүгүн, 8-февралда Орусиянын Смоленск облустук соту кабыл алганын SUPER.KG'ге "Замандаш" партиясынын өкүлү Эрлан Бекчоро уулу кабарлады.

Чыңгыз Анарбек уулу өзүнүн WhatsApp аркылуу жиберген сөзүнө караганда, облустук сот аны мөөнөтүнөн мурда бошотту. "Сот чечимди бүгүн, 8-февраль күнү саат 10до кабыл алды. Буга чейин Тверь райондук соту 1 жыл 6 айга кара жумушка тартуу боюнча чечим чыгарган. Азыр мөөнөтүнөн мурда бошотуу боюнча сот иши болду. Прокурор алгач каршы болуп жаткан. Баары жакшы жыйынтыкталып, сот бошотту. 19-февралда эркиндикке чыгам", - деди Анарбек уулу.

Чыңгыз Анарбек уулу 2018-жылы 16-июнь күнү Москванын борбордук көчөлөрүнүн биринде мексикалык футбол күйөрмандарын сүзүп кеткен. Кырсыктан 8 киши жаракат алган. Айдоочу полиция кызматкерлерине сурак берип жатканда күнү-түнү иштеп уктабагандыктан жолдо уктап кеткенин айткан.

Факты боюнча кылмыш иши козголуп, Анарбек уулу тергөө абагына камакка алынган болчу.