"Коопсуз шаар" долбоорун ишке киргизүү боюнча даярдыктар текшерилди

Премьер-министр Мухаммедкалый Абылгазиев Ички иштер министрлигинин Жол кыймылынын коопсуздугун камсыздоо башкы башкармалыгынын мониторинг борборуна барды. Бул тууралуу өкмөттүн басма сөз кызматы билдирди.

Маалыматка ылайык, мониторинг борбору "Коопсуз шаар" долбоорунун алкагында аппараттык-программалык комплекс аркылуу аныкталган жол кыймылынын эрежелерин бузуу материалдарын иштеп чыгуу менен алектенет. Алар андан соң "Кыргыз почтасы" аркылуу унаа каражаттарынын ээлеринин катталган дарегине жеткирилет.

Өкмөт башчыга билдирилгендей, бүгүнкү күнү бардык даярдыктар талапка ылайык белгиленген мөөнөттө жүргүзүлүп жатат. Бардык материалдык-техникалык база даярдалган, тийиштүү окутуудан өткөн кызматкерлердин штаты түзүлгөн.

Мухаммедкалый Абылгазиев мониторинг борборунун ишинин бардык баскычтары менен таанышты. Тийиштүү маалыматтар аталган башкармалыктын расмий сайтынын "Коопсуз шаар" бөлүмүндө жеткиликтүү болот.

Тутумдун долбоорду ишке киргизүүгө даярдыгы менен таанышкан соң премьер-министр долбоорду баскычтуу ишке киргизүүнү тапшырды.

"12-февралдан баштап аппараттык-программалык комплекстерди, мониторинг борборун, ошондой эле бузууларды каттоону ишке киргизүү кажет. Аныктоо, каттоо, жеткирүү жана айып пулдарды төлөөнүн бардык механизмдери так иштеп, жарандар үчүн түшүнүктүү жана ыңгайлуу болушу керек", - деди өкмөт башчы.