Мамкаттоо унаа ээсин же ишеним каттын негизинде унааны сатып алган адамды издөө кызматын ишке киргизди

Мамлекеттик каттоо кызматы унаанын ээсин же ишеним каттын негизинде унааны сатып алган адамды табууга жардам берген атайын кызматты ишке киргизди. Анда электрондук кызмат көрсөтүүлөр порталына билдирүү калтырып, издеген кишини табууга болот.

Мекеменин маалыматына караганда, бул кызмат транспорт каражатын ишеним каттын негизинде саткандарга да, сатып алгандарга да унаа ээлерин табууга бирдей мүмкүнчүлүк түзүп берет.

Аталган кызматты колдонуу үчүн атайын каттоодон өтүүнүн зарылчылыгы жок. Болгону электрондук кызмат көрсөтүүлөр порталына кирип, транспорт ээсин же сатып алган адамды издөө бөлүмдөрүнө кирип керектүү маалыматтарды толтуруу керек.

"Бүгүнкү күнү "Транспорт каражатынын ээсин издөө" кызматы транспорт каражатын кайра каттоодо унаалардын ээсин издөө маселесин чечүүчү жана унаа ээлерин издөө боюнча жалгыз ресурс болуп эсептелет. Ошондуктан Мамлекеттик каттоо кызматы унаа каражатынын ээлерин издеген жарандарды аталган кызматтан пайдаланууга чакырат. Толук маалыматты Мамлекеттик каттоо кызматынын "119" кыска номери аркылуу алсаңыздар болот. Чалуу бардык мобилдик операторлордон акысыз", - деп айтылат маалыматта.