Баткенде тажиктер менен укук коргоо кызматкерлеринин ортосунда кагылышуу чыкты

22-июлда Баткен облусунун Исфана шаарындагы мейманканалардын биринен укук коргоо кызматкерлери Тажикстандын жаранын 1 килограмм баңгизат менен кармашкан. Баңгизатын көзөмөлдөө мамлекеттик кызматынын билдиришинче, ошол эле аймакта дагы 5 килограмм баңгизаты бар экендиги тууралуу маалымат түшүп, издөө иштери жүргөн. Бул учурда, тактап айтканда, саат 02:50 чамасында 15тей адам келип, кармалган тажикстандык жаранды коё берүүнү талап кылышкан. Топтолгондор укук коргоо кызматкерлерин коркутуп, кылмышка шектүү кармалып турган мейманкананын ичине күч колдонуп кирип кетишкен. Героин менен кармалган жаранды качырып жибербөө үчүн табелдик курал колдонулуп, натыйжада Тажикстандын бир жараны жаракат алган. Бул окуя боюнча Лейлек РИИБине билдирүү жөнөтүлүп, Кулунду айылында аталган окуяга тиешеси бар 2 жаран кармалган. Маалыматтарга ылайык, бул жарандар Тажикстандагы уюшкан кылмыштуу топтун мүчөлөрү экендиги аныкталды. Учурда жарадар болгон тажик жаранына операция жасалып, кармалган жаранга карата кылмыш иши козголду. Учурда бул окуяга тиешеси бар башка жарандарды издөө иштери улантылууда.