Бишкекте эреже бузган айдоочуларга салынган айып пулдун жалпы көлөмү тактала элек

Бишкекте эреже бузган айдоочуларга салынган айып пулдун 2 күндөн берки жалпы көлөмү так эмес. Тактап айтканда, "Коопсуз шаар" долбоору иштеп баштаган күнү эле мониторинг борборунун экранында 9,5 миллион сомдук айып пул катталганы көрүнгөн. Бирок аталган борбордун жетекчиси Гүлмира Баратова болгону 761 эреже бузулуп, 878 миң сомдук айып пул катталганын билдирген.

ИИМдин Жол кыймылынын коопсуздугун камсыздоо башкы башкармалыгы бир күндө 761 эреже бузуу болгонун, бирок айдоочуларга салынган айып пулдун көлөмү дале так эмес экендигин билдирди. Мекеменин басма сөз кызматынын өкүлү Нурбек Токтосунов SUPER.KG'ге билдиргенине таянсак, айдоочу эреже бузганы же бузбаганы Жол кыймылынын коопсуздугун камсыздоо башкы башкармалыгы тарабынан аныкталат.

"12-февраль күнү эле жалпы 9,5 миллион сомдук эреже бузуу катталды делип жаткан маалымат туура эмес. Ал сумма тестирлөө убагындагы маалымат. Мониторинг борбору Бишкек шаарынын аймагында 12-февраль күнү 761 эреже бузуу болгонун билдирген. Бирок биздин кызматкерлер ким кандай категорияда жана кандай эреже бузганын аныктап чыгышы керек. Ошондуктан айып пулдун жалпы көлөмү азырынча так эмес", - деп түшүндүрдү Токтосунов.

12-февралда "Коопсуз шаар" долбоору ишке кирген. Анын алкагында шаар көчөлөрүндөгү 10 кесилишке коюлган камералар 7 эреже бузууну каттап баштаган. Анда эреже бузган айдоочу 1 миң сомдон 23 миң сомго чейин айыпка жыгылат.