Футболчу Серхио Рамос кызыл айып кагазы боюнча Европадагы рекордду жаңылады

17-февралда Испания чемпиондугунун алкагында "Реал Мадрид" клубу өз талаасында каталондук "Жирона" клубун кабыл алган.

Беттештин 25-мүнөтүндө талаа ээлеринин жарым коргоочусу Каземиро эсепти ачса, 65-мүнөттө Кристиан Стуани 11 метрлик айып соккуну таамай аткарып, эсепти теңеди. Ал эми 75-мүнөттөгү Кристиан Портунун голу "Жиронага" жеңишти алып келди.

Беттештин 90-мүнөтүндө мадриддик клубдун капитаны Серхио Рамос кызыл айып кагазын алып оюндан четтетилген. Бул кызыл кагаз Рамос үчүн Ла Лиганын алкагындагы 20-кагазы болуп, Европадагы күчтүү 5 лиганын арасындагы рекордун жаңылады. Рамос 19 айып кагазын алган Франция чемпиондугунун мурдагы оюнчусу Сирил Роолду ашып өттү.

Мындан сырткары "Реалдын" коргоочусу жалпы карьерасындагы 25-кызыл айып кагазына ээ болду. Ал Чемпиондор Лигасында 3 жолу, Испания Кубогунда 2 жолу беттештен четтетилген.

Ла Лиганын 24 турунан кийин "Реал Мадрид" 45 упай менен 3-орунда келе жатат. Ал эми 27 упайга ээ болгон "Жирона" 15-орунда. Турнирдик жадыбалдын лидери "Барселона" клубу болсо, 2-орунду "Атлетико Мадрид" клубу ээлейт.