Эл өкүлү: "Давыдов жана Лысый мөңгүлөрүн экономикалык максатта колдонбоо керек"

Бүгүн, 19-февралда Кыргыз Республикасынын Суу кодекси боюнча депутаттар жана эксперттердин катышуусунда жыйын өтүп жатат.

Жыйында депутат Рада Туманбаева Давыдов жана Лысый мөңгүлөрүн экономикалык максатта колдонбоо керек экенин айтты.

Талкуу учурунда журналисттер Туманбаевага "Давыдов жана Лысый мөңгүлөрүн экономикалык максатта колдонбоо керек болсо, "Кумтөр" компаниясында иштеп жаткан жумушчуларды ким жумуш менен камсыз кылат?" деген суроо узатышты.

"Мен бул тармакты жакшы билген адис эмесмин. Бирок келечекте балдарымдын бетин уялбай кароо үчүн Давыдов жана Лысый мөңгүлөрү сакталып калсын деп добуш берем. Суу кодексине өзгөртүүлөрдү киргизүү керек деген демилгени "Ата Мекен" фракциясы көтөргөн. Бүгүнкү күн менен жашабай, келечекти да ойлоо керек. Учурда миңдеген жаңы технологиялар чыгып жатат. Ошол тармактарда иш тапса болот", - дейт депутат.