"Бир да жасалма жумуртка табылган жок". Ветеринардык жана фитосанитардык инспекция "резина" жумуртка боюнча үн катты

"Интернетте тарап жаткан жасалма жумурткалар делген видео боюнча иликтөө жүрүп, бир да жасалма жумуртка табылган жок". Мындай маалыматты бүгүн, 19-февралда басма сөз каражаттарынын өкүлдөрүнө Ветеринардык жана фитосанитардык коопсуздук боюнча мамлекеттик инспекциясынын жетекчиси Калысбек Жумаканов билдирди.

Анын айтымында, интернетте тараган жумурткалар Ошко Ысык-Көл облусунан алынып келген.

"17-февралда социалдык тармактар аркылуу тараган видео боюнча биздин инспекция УКМКнын кызматкерлери менен биргеликте иликтөө жүргүздү. Иликтөөнүн негизинде Ош шаарындагы бардык 17 жумуртка сакталган жерлер текшерилди. Ар бир жумуртка сакталган жерден үлгүлөр алынып, экспертизага жөнөтүлдү. Ошондой эле адистер тарабынан жеринен жумурткаларды жарып көрүштү. Жасалма жумуртканын сыртындагы катуу кабыгы менен ичинин ортосунда чел кабык болбойт. Текшерүүдө бир да жасалма жумуртка табылган жок.

Мындан сырткары УКМКнын кызматкерлери видеону тараткан Урматбек аттуу Ош шаарынын тургунун да тыбышты. Анын айтымында, видеодогу жумурткаларды Оштогу "Арча" чакан базарынан сатып алыптыр. Ал жерде да текшерүү иштери жүргүзүлүп, жасалма жумуртка табылган жок. Жумуртка Ысык-Көл облусундагы тоок фермасына таандык экендиги белгилүү болду.

Жасалма жумурткалар Өзбекстандан аткезчилик жол менен алынып келген болушу мүмкүн деген божомолдор аныкталган жок", - деди Жумаканов.