Ветеринардык жана фитосанитардык инспекциянын жетекчиси: "Эки жылдан бери өлкөгө Кытайдан бир да жумуртка кире элек"

2 жылдан бери Кытайдан Кыргыз жерине бир да жумуртка кире элек. Бул тууралуу бүгүн, 19-февралда Ветеринардык жана фитосанитардык коопсуздук боюнча мамлекеттик инспекциясынын жетекчиси Калысбек Жумаканов билдирди.

Анын айтымында, 2017-жылдан бери өлкөгө кирген жумурткалардын дээрлик бардыгы Орусия менен Казакстандан алынып келген.

"2018-жылдын жыйынтыгы менен өлкөгө 20 миллиондон ашык жумуртка алынып келди. Алардын дээрлик 100 пайызы Евразиялык экономикалык биримдикке кирген өлкөлөрдөн келди. Тактап айтканда, Орусия менен Казакстандан. Жумуртканы өлкөгө алып кирген ишканалардын баары ЕАЭБдин бирдиктүү реестринде турган ишканалар жана баарына кепилдик бар. ЕАЭБге кирбеген өлкөлөрдөн, мисалы, Кытайдан 2017-2018-2019-жылдары бир дагы жумуртка кирген эмес. Болгону Өзбекстандан 2018-жылдын башында 300 миңдей жумуртка кирген. Андан башка экономикалык биримдикке кирбеген өлкөлөрдөн жумуртка алынып келген жок", - деди Жумаканов.