Ташкент-Балыкчы авиакаттамы жанданышы мүмкүн

Кечээ, 19-февралда Кыргыз өлкөсүнүн Өзбекстандагы элчиси Ибрагим Жунунсов Өзбекстандын Учуулардын коопсуздугун көзөмөлдөө инспекциясынын башчысы Толиб Ульжаев менен жолугушту. Бул тууралуу Тышкы иштер министрлигинин басма сөз кызматы кабарлады.

Маалыматка ылайык, жолугушууда Ташкент-Балыкчы авиакаттамын жандантуу боюнча кеп козголгон.

"Тараптар жарандык аба жаатында эки тараптуу кызматташуунун учурдагы абалы жана Кыргыз-Өзбек авиация кызматтарынын ортосундагы мындан аркы өз ара алака жөнүндөгү маселелерди талкуулашты. Кыргыз тарап Ташкент-Балыкчы маршрутундагы чартердик каттамдарды кайрадан баштоо боюнча сунушун киргизди. Мындан сырткары тараптар "Ош-Ташкент-Ош" багытындагы каттамдар жөнүндө маселелерди талкууга алышты", - деп айтылат маалыматта.