Атамбаев менен Сарпашевге каршы доо арыз толуктоо үчүн артка кайтарылды

Айдар Халиков деген жаран экс-президент Алмазбек Атамбаев менен Мамлекеттик каттоо кызматынын мурдагы төрагасы Тайырбек Сарпашевди паспорттон улуту тууралуу графасын алып салгандыгы үчүн сотко бергенин социалдык түйүндөгү баракчасына жазып чыкты.

“Улутту паспорттон алып салган мыйзамын жокко чыгарууну жана менин үй-бүлөмө жеткен моралдык зыянды 6 миллион сомго баалап, Атамбаев менен Сарпашевди сотко бердим”, - деп жазды Халиков.

Аламүдүн райондук соту SUPER.KG порталына билдиргендей, Халиков кечээ, 19-февралда сотко арыз менен кайрылган.

"Аламүдүн райондук соту аталган арызды берүүдө Жарандык-процесстик кодексинин 134-беренесинин талаптарына ылайык, арызды жазууда анын формасы жана мазмуну сакталбастан, ошондой эле 135-беренесинин талаптарына ылайык, арызга тийиштүү документтер, анын паспортунун көчүрмөсү, ырастоочу далилдер тиркелбестен берилгендигин билдирет. Буга байланыштуу Аламүдүн райондук соту арызды кайтаруу үчүн негиз болгон жагдайлар жоюлгандан кийин ошол эле талап менен жалпы тартипте сотко кайталап арыз менен кайрылууга тоскоолдук болбой тургандыгын маалымдайт", - деп жазылат маалыматта.