ЭЛДИК ВИДЕО: "Таласта иске ууланган үй-бүлөнүн электр жарыгын өчүрүп кеткен электрикти эл тилдеди"

SUPER.KG порталынын "Элдик видео" бөлүмүнө "Таласта иске ууланган үй-бүлөнүн электр жарыгын өчүрүп кеткен электрикти эл тилдеди" деген видео жүктөлдү.

Буга чейин маалымдалгандай, ал үйдүн кожойкеси жана кызы каза болуп калган. Мындан тышкары 2 баласы оор абалда ооруканага жаткырылган. Үй-бүлөнүн электр энергиясы үчүн 2 миң 483 сом карызы болгондуктан кырсыктан бир күн мурун "Түндүк электр" ишканасы тарабынан үйдөгү электр жарыгы өчүрүлгөн. Алар түнкүсүн жылынуу үчүн чакага от жагууга аргасыз болуп, түнү иске ууланып калышкан.

Видеодо эл топтолуп "Сен аял экенсиң, кантип балдардын суранычына карабай өчүрүп кеттиң, үйдүн кожойкеси ооруканада жатканын, келгенде карызын төлөй турганын түшүндүргөнүнө карабай электр өткөргүчтөрүн үзүп кетиптирсиң", - деп аялды тилдешкен. Ал эми ал: "Мен мындай болуп кетерин билген эмесмин, бизден да ошондой мамиле кылууну талап кылышат", - деп жооп берет. Топтолгон эл болуп өткөн окуяга кейип, "Түндүк электр" ишканасынын бул аракети адамдын өмүрүнүн кыйылуусуна алып келди деп сыпатташат.

Бул видео интернет колдонуучулары тарабынан талкууга алынып, түрдүү пикирлер жазылууда. Арасында: "Ал бир жөнөкөй кызматкер, коюлган талаптарды аткарып иштеди. Кышкысын электр энергиясы өчүрүлбөйт деген эреженин жоктугу кызык, кептин баары системде жатпайбы", - деп жазгандар да бар.