Орусияда 3 жаштагы кызын жалгыз бир жумага батирге камап койгон эне камакка алынды. Кыз ачкадан каза болгон

Орусиянын Киров облусунда 3 жаштагы кызын жалгыз бир жумага батирге камап койгон эне камакка алынды. Бул тууралуу орусиялык маалымат каражаттары жазып чыгышты.

Маалыматка ылайык, 20-февраль күнү Кировдогу батирлердин биринен 3 жаштагы кыздын жансыз денеси табылган. Кыздын денесинен эч кандай кыйноо белгилери табылган эмес. Дарыгерлер медициналык кароодон кийин ал ачкадан жана үшүп каза болгонун билдиришкен. Жүргүзүлгөн иликтөө иштеринин алкагында 21 жаштагы Мария П. аттуу келин кызын атайын үйүнө камап коюп кетип калганы аныкталган. Кызынын туулган күнүндө жаш эне аны социалдык тармак аркылуу куттуктап, "менин жашоом, чоңоюп калдың, бүгүн сенин күнүң" деген билдирүү калтырган.

"Кичинекей кыздын жансыз денесин аны туулган күнү менен куттуктап келген таенеси тапкан. Кызын атайылап өлтүрүүгө шектелип жаткан Мария П. 19 жашында төрөгөн. Алгач ал апасы менен бирге жашап, кийин пикир келишпестиктен улам апасы көчүп кеткен. Соттук отурумда Мария П. кылганына өкүнгөндүгүн билдирген жок. Ал "ооба, мен кетип калгам, сууну жаап, баланы тамаксыз калтырып кеткем" деп билдирген. Соттун чечими менен ал 2 айга камакка алынды. Учурда бул факт боюнча тергөө амалдары жүрүүдө", - деп айтылат маалыматта.