Саламаттыкты сактоо министри: "Өлкөдө жүрөккө операция жасаган хирургдар 15 миң сом айлык алат"

Өлкө аймагында жүрөккө операция жасаган хирургдар 15 миң сомдун айланасында айлык алат. Бул тууралуу бүгүн, 25-февралда Бюджет жана финансы боюнча комитетинин отурумунда Саламаттыкты сактоо министри Космосбек Чолпонбаев билдирди.

Отурумда "Бишкек шаарында 2018-жылдын 1-сентябрында кол коюлган Кыргыз Республикасынын өкмөтү менен Түркия Республикасынын өкмөтүнүн ортосундагы Бишкек мамлекеттик Кыргыз-Түрк достугу ооруканасын ачуу, биргелешип башкаруу жана өткөрүп берүү, ошондой эле Кыргыз Республикасынын жарандарынын медицина жана медициналык адистиктер чөйрөсүндө Түркия Республикасында билим алуусу жөнүндө макулдашууну ратификациялоо жөнүндө” Кыргыз Республикасынын мыйзам долбоору талкууланууда.

Саламаттыкты сактоо министри Бишкектеги Фучик көчөсүндө жаңы курулган Кыргыз-Түрк достук ооруканасы боюнча жалпы маалымат берип, ал жакта башкы дарыгер катары түрк жараны, ал эми анын орун басары болуп кыргыз дарыгер дайындала турганын билдирди.

"Жарандарыбызга жакшы медициналык камсыздоо көрсөтүүнү биздин максатыбыз деп айттыңыз. Менде суроо жаралды, мисалы, ооруканада дарыгерлердин күнөөсүнөн канча бейтап каза болот?" - деди депутат Сайдулла Нышанов.

Саламаттыкты сактоо министри: "Ал жерде жарандардын да күнөөсү бар. Ооба, дарыгерлердин айынан да каза болгон учурлар жок эмес", - деди.

Буга депутат: "Сизге санын айтуу кыйын болуп жатса мен айтайын. Өткөндө дарыгерлер менен сүйлөштүм. Дарыгерлердин айынан бейтаптардын 30 пайызы каза болот десем, дарыгерлер мага "жок, 40 пайызы" деп айтышты. Бул жаман көрсөткүч, бул медициналык окуу жайлардын окутуу деңгээлинин көрсөткүчү.

Жаңы курулган ооруканада түрк жарандары биздин айлыкка иштебейт, иштешсе да бир күн иштеши мүмкүн", - деди Сайдулла Нышанов.

"Албетте, ооруканада иштей турган түрк жарандары бул жактан өз мекенинде алган айлыкты алат. Андай болбосо алар келбей коюшу мүмкүн", - деди Космосбек Чолпонбаев.

"Жакында эле 62 жаштагы жаран экинчи жолу 96 миң сом төлөп, бирок операциядан чыкпай калды. Ошол акчаны жакындары кайтарып алса болобу?" - деп кошумча суроо берди депутат. Буга саламаттыкты сактоо министри "карап көрөлү" деп жооп кайтарды.