Аэропорт демейдегиден башкача. Башкы штабдын оркестри "Кыргыз маршы", "Кыз куумай", "Кара жоргону" аэропортто жаңыртты

"Манас" эл аралык аэропорту менен Кыргыз Куралдуу күчтөрүнүн башкы штабы аэропортто музыкалык флешмоб уюштурду. Башкы штабдын оркестри аткарган түрдүү композициялар аэропорттун залын жаңыртып, өлкө аймагына кирип келгендерге ары таң калычтуу, ары жагымдуу маанай тартуулады. Бул тууралуу мекеменин басма сөз кызматы кабарлап, видео менен бөлүштү.

Маалыматка ылайык, иш-чара 23-февраль - Ата Мекенди коргоочулардын күнүнө карата уюштурулган.

"Акциянын башталышында аэробекеттин 2-кабатындагы залда барабандын үнү жаңыра баштады. Андан кийин чыгыш жанан батыш тараптан марш тепкен мекен сакчылары музыканын коштоосунда чыгышты. Мындай көрүнүштү күтпөгөн жүргүнчүлөр патриоттук сезимге чулганды. Жалпы 42 аскер кызматкери оркестрдин коштоосунда марш тебишти", - деп жазылат маалыматта.

Флешмобдун жүрүшүндө Дастан Жуматай уулунун дирижёрлугу алдында "Кыргыз маршы", "Кыз куумай", "Кара жорго" жана башка композициялар жаңырды.