Орусия Кыргыз жеринен жана Казакстандан ташылып бараткан 52 тоннадан ашык жүктү артка кайтарды

Орусия Кыргыз жеринен жана Казакстандан ташылып бараткан 52 тонна 800 килограмм жүктү артка кайтарды. Мындай маалымат Орусиянын Ветеринардык-фитосанитардык көзөмөл кызматынын расмий сайтына 25-февралда жарыяланды.

Андагы маалыматка караганда, аталган кызматтын инспекторлору 18-февралдан 24-февралга чейинки аралыкта Новосибирск аймагындагы "Карасук" өткөрүү пунктунан Кыргыз жеринен жана Казакстандан ташылып бараткан жүктөрдүн мыйзамдуулугун текшерген. Анын жыйынтыгында, 52 тонна 800 килограмм кургатылган жер-жемиштин фитосанитардык сертификаты жоктугу аныкталган. Мындан улам жүк артка кайтарылып, күнөөлүү тараптар жоопкерчиликке тартылганы айтылат маалыматта.

Айыл-чарба, тамак-аш өнөр жайы жана мелиорация министрлигинин басма сөз кызматы 52 тонна 800 килограмм жер-жемиштин 1 тонна 200 килограммдайы гана Кыргыз өлкөсүнө таандык экенин кабарлады.

"Айыл-чарба азык-түлүктөрүнүн коопсуздугу боюнча фитосанитардык сертификаты жок экспорттоочулар өздөрүнө жана мамлекетке экономикалык жактан зыян алып келип жатканын баса белгилеп кетебиз. Фитосанитардык сертификатты министрликтин алдындагы Өсүмдүктөр карантини департаменти тарабынан 500 килограммдан жогорку жүккө 492 сомго берилет", - деп кабарлашты министрликтен.