Чиедей беш баласын жалгыз баккан энеге жардам бергендердин саны арбыды

25-февралда SUPER TV Бишкектин четиндеги Алтын-Казык жаңы конушунда таштанды терип 5 баласын жалгыз багып жаткан 31 жаштагы Нургүл Бекиеванын турмушун баяндаган.

Бекиеванын тагдырына кайдыгер карабаган жарандар тынымсыз байланышка чыгып, жардам бергендердин саны арбыды. Айрымдары акчалай түрдө жардам берип жатса, айрымдары турмуш-тиричилигине керектүү буюмдардан тартып азык-түлүгүнө чейин алып келип беришүүдө.

Алар менен бирге Нургүл Бекиеванын турмуш-шартынан эмгек жана социалдык өнүктүрүү министринин кеңешчиси Дайырбек Орунбеков, министрдин орун басары Жаңыл Алыбаева да барып кабар алып жардам көрсөттү. Министрликтин өкүлдөрү үй-бүлөнүн бала бакча, мектеп жана жөлөк пул маселесин чечип бере турганын билдиришти.

"Учурда Нургүл Бекиеванын балдарынын туулгандыгы тууралуу күбөлүгү бар болгону менен, өзүнүн паспорту жок экен. Паспорт берүү биздин милдетибиз болбосо да паспорт алууга жардам беребиз. Паспорту даяр болсо, министрликтин Аламүдүн районундагы Эмгек жана социалдык өнүктүрүү башкармалыгы тарабынан документтер чогултулуп, балдарынын ар бирине ай сайын 810 сомдон жөлөк пул берилип баштайт. Мындан сырткары Нургүлдүн тигүүчүлүк жөндөмү бар экен. Ошондуктан биздин Жумуш менен камсыз кылуу башкармалыгыбыз тарабынан аны тигүү цехине жумушка орноштурууга көмөктөшөбүз", - деди Алыбаева.

26-февралда "Алыш" федерациясынын вице-президенти, жеке ишкер Советбек Рустамбек уулу да Бекиеванын үй-бүлөсүнө көмөк көрсөтүп, жер маселеси чечилсе үй салып бере турганын билдирген.