Учакта 10 саат бою уча турган эне 4 айлык баласы ыңгайсыздык жаратышы мүмкүн деп жүргүнчүлөрдөн алдын ала кечирим сурады

Сеул-Сан-Франциско каттамынын жүргүнчүсү Дейв Корона өзүнүн интернеттеги жеке баракчасына баштыкчага таттуулар салынган сүрөттү жүктөп билдирүү жазган.

Ал билдирүүсүндө баштыкчада таттуулар жана кичинекей баракка жазылган жазуу бар экенин айткан. Баш-аягы 200дөй баштыкчаны жүргүнчүлөрдүн баарына учакта 4 айлык баласы менен бара жаткан эне тараткан. Себеби ал ымыркайынын 10 саатка созула турган узак жолдо ыйлап, жүргүнчүлөргө ыңгайсыздык жаратуусун алдын алып, алардан кечирим сураганы болгон.

"Бүгүн АКШга апам жана чоң апам болуп, таежеме учуп баратам. Кичине кабатыр болуудамын, себеби алгачкы жолу учуп жатабыз. Балким, мен ыйлашым мүмкүн, бирок бул кылыкты жасабаганга аракет кылам. Ошондуктан алдын ала кечирим сурайм", - деген кат 4 айлык наристенин атынан жазылган.

Ал эми билдирүүнүн автору бул учактагы адамдар үчүн өзгөчө көрүнүш болгонун, ымыркай учакта 10 саат бою ыйлабай тынч барганын жазган.