Бектур Асанов менен Кубанычбек Кадыров соттолгон деген статусту жоюуга жетишсе парламенттик шайлоого катышарын билдиришти

Кыргыз мамлекетинин мурунку президенти Алмазбек Атамбаев өлкөдөгү коомдук-саясий кырдаалды туруксуздаштырууну көздөөдө. Мындай пикирин бүгүн, 1-мартта маалымат жыйында камактан бошотулган саясатчы, экс-депутат Кубанычбек Кадыров билдирди.

"Алмазбек Атамбаев учурда өлкөдөгү саясий кырдаалды курчутуу аракеттерин көрүүдө. Соттолгондугубуз алынбаса да биз шайлоого катышууну көздөп жатабыз. 2020-жылга чейин соттолгон деген статусубузду жоюуга аракет кылабыз. Бул маселе чечилбей калса, өз атыбыздан чыга албасак кайсы бир саясий топко кошулабыз. Биз саясатта болгонбуз жана саясаттан кетпейбиз", - деди Кадыров.

Экс-губернатор Бектур Асанов "бизди каматып, соттоткон күнү да биз саясаттан кетпейбиз" деп кошумчалады.

Аты аталган саясатчылар 12-февралда мөөнөтүнөт мурда бошотулушкан, бирок акталган эмес.

"Президент жана депутаттарды шайлоо жөнүндөгү" Конституциялык мыйзамга айрым чектөөлөрдү киргизген документке ылайык, мурда соттолгондор шайлоого талапкер катары катыша алышпайт.