31-майга чейин өлкө аймагындагы шаарларда жана калктуу конуштарда тазалоо, жашылдандыруу иштери жүргүзүлөт

2019-жылдын 1-мартынан 31-майына чейин өлкө аймагындагы шаарларда жана калктуу конуштарда санитардык тазалоо, жашылдандыруу иштери боюнча үч айлык өтөт. Тиешелүү чечимге премьер-министр Мухаммедкалый Абылгазиев кол койгонун өкмөттүн басма сөз кызматы билдирди.

Үч айлык өткөрүү жөнүндө чечим Кыргыз Республикасынын шаарларынын жана калктуу конуштарынын социалдык инфраструктурасын, санитардык абалын жакшыртуу, аймактарын жашылдандыруу жана көрктөндүрүү максатында кабыл алынганы маалым болду.

Жарыяланган үч айлыктын алкагында төмөнкү иш-чаралар аткарылат:

- көчөлөрдү, короолорду тазалоо боюнча ишембиликтерди өткөрүү;
- администрациялык жана турак жай имараттарынын тышкы көрүнүшүн оңдоо;
- көчөлөрдү жарыктандыруу;
- тосмолорду, дубалдардын көрүнүшүн оңдоо;
- калктуу конуштарда жалпы жашылдандыруу боюнча иштерди жүргүзүү;
- муниципалдык жолдорду оңдоо;
- социалдык чөйрөнүн жана айылдык инфраструктура объекттерин оңдоо.