Экотехинспекция: "Ошто коопсуздук эрежелерин сактабай кран иштеткендер текшерүү жүрбөшү үчүн атайын дем алыш күнү иштеп жатышкан"

Ошто Масалиев көчөсүндө курулушчулар коопсуздук эрежелерин сактабай кран иштетип жатышканын "ЭЛДИК КАБАР" бөлүмүнө байланышкан окурман билдирген эле.

SUPER.KG порталына Ош шаардык экологиялык-техникалык инспециянын директорунун орун басары Талант Эшбаев эмне себептен коопсуздук эрежелеринин сакталышы көзөмөлдөнбөй калганы тууралуу айтып берди.

"Текшерген кызматтарга дем алыш болгон күндү аңдып туруп, атайын ишемби, жекшемби күндөрү иш алып барып жатышат. Бүгүнкү окуя боюнча барып эскертүү бердик. Долбоордун автору менен сүйлөшүшүбүз керек. Ошол жердеги орнотулуп жаткан лифттин шахтасын долбоор боюнча кантип көтөрүү керектигин, документтерин текшерип көрөлү. Ошого жараша жаңы кодекстер боюнча чара көрүлөт. Алар уруксат кагаздарын Архитектура, курулуш жана турак-жай коммуналдык чарба агенттигинен алышы керек. Бүгүн уруксат кагаздарын көрсөтө алышкан жок. 4-мартта документтерин алып келишет", - деди Талант Эшпаев.