Жогорку Кеңештин төрагасынын ката жазылган каты боюнча түшүндүрмө берилди

Жогорку Кеңештин аппараты өткөн аптада социалдык түйүндөрдө тарап кеткен документ боюнча иликтөө иштерин жыйынтыктады. Бул тууралуу парламенттин басма сөз кызматы билдирүү таратты.

"Тилекке каршы, аталган документте чындыгында одоно каталар орун алган. Айрым маалымат булактарында белгиленип жаткандай, бул катты Жогорку Кеңештин төрагасы Дастанбек Жумабеков өз колу менен жазган эмес. Тиешелүү бөлүмдүн кызматкери даярдап, төраганын колу анын жардамчысы тарабынан факсимиле (так өзүндөй кылып кол жазманын сүрөтүн түшүрүү) жолу менен коюлган. Жогорку Кеңештин жетекчилигине күнүнө жүздөгөн документтер кол коюуга жөнөтүлөт. Алардын арасында сунуш берүүчү мүнөздөгү жөнөкөй документтерге көпчүлүк учурда факсимиле жолу менен кол тамга басылат. Убакыттын тардыгынан улам төрага мындай документтерге кол коюуда өзүнүн жардамчыларына жана адистерге таянат. Аталган кат боюнча кемчилик кетирген кызматкерге карата тиешелүү жаза колдонулмакчы", - деп жазылат маалыматта.