Таласта иске ууланган үй-бүлөнүн 4 жаштагы кызы эсине келе элек

Таласта иске ууланган үй-бүлөнүн 4 жаштагы кызы дале эсине келе элек. Бул тууралуу Бишкектеги Эне жана баланы коргоо борборунан билдиришти.

Дарыгердин айтымында, кыздын ооруканада жаткырылганына бир жума болду.

"Кыз катуу ууланган. Анын мээси катуу жабыркаган. Мындан улам эсине келиши көп убакытты алууда", - деди борбордон.

Окуя 20-февралга караган түнү болгон. Андан бир күн мурун үй-бүлөнүн электр энергияга болгон карызы төлөнбөй, адистер электр жарыгын өчүрүп кетишкен. Буга байланыштуу алар үйдүн ичинде от жаккан меш болбогондуктан темир челекке от жагып, андан чыккан иске ууланып калышкан. Үй ичинде уктап жаткан үй кожойкеси менен бир кызы каза болуп, 12 жаштагы уулу менен 4 жаштагы кызы оорукананын жандандыруу бөлүмүнө жеткирилген.

Ал эми аталган үй-бүлөнүн 2483 сом карызы үчүн электр жарыгын өчүрүп кеткен монтёр менен инспектор жумуштан бошотулган.