Кайдасың, Роналду? "Реал Мадрид" 9 жылдан бери алгачкы жолу Чемпиондор Лигасынын чейрек финалына өтпөй калды

6-мартка караган түнү Чемпиондор Лигасынын жарым чейрек финалынын алкагындагы жооптук беттештер старт алып, чейрек финалга чыккан алгачкы 2 команда аныкталды. Жарым финалга чыгуу укугу үчүн германиялык "Боруссия Дортмунд" клубу менен англиялык "Тоттенхэм" командасы жана испаниялык "Реал Мадрид" клубу менен голландиялык "Аякс" командасы беттешти.

"Реал Мадрид" - "Аякс"

"Реал Мадрид" - "Аякс" беттеши Мадрид шаарындагы "Сантьяго Бернабеу" стадионунда орун алды. Акыркы 3 жыл катары менен Чемпиондор Лигасын жеңип алган мадриддик клуб өз талаасында ачык фаворит катары беттешке чыкты. Буга кошумча "Аякс" клубу акыркы 16 жылдан бери аталган мелдештин чейрек финалына чыга элек болчу.

Талаа ээлери алгачкы мүнөттөрдөн тартып активдүүлүгүн көрсөтүп, оюндун 4-мүнөтүндө кооптуу абал жарата алышты. Оң капталдан Лукас Васкестин чыгарып берген тобун коргоочу Рафаэль Варан башы менен дарбазага багыттап, бирок конокторду голдон дарбаза мамысы сактап калды. Мындай чабуулга "Аякс" командасы дароо таамай жооп кылып, 7-мүнөттө жарым коргоочу Хаким Зиеш атаандаштын кетирген катасынан пайдалануу менен эсеп санын ачты. Андан ары "Реал" чабуулдарды уюштуруп, топту карамагына алууга аракет кылганы менен, 18-мүнөттө Давид Нерес "Аякска" дагы бир гол алып келди. 29-мүнөттө Лукас Васкес, 35-мүнөттө Винисиус Жуниор жаракатынан улам оюндан четтеп, ордуна Гарет Бэйл менен Марко Асенсио кирди. Оюндун биринчи бөлүгүндөгү негизги учурлар ушуну менен жыйынтыкталды.

Беттештин 2-бөлүгү мадриддик команданын анча чоң эмес үстөмдүгү менен өттү. Талаа ээлери топко көбүрөөк ээ болуп, көбүрөөк чабуулдарды уюштуруп жатты. Бирок түзүлгөн мүмкүнчүлүктөрдү колдонуп, дарбазага топту таамай багыттай алган оюнчу "Реалдын" катарында болгон жок. 62-мүнөттө Душан Тадич дагы бир гол жаратып, оюн эсебин ири эсепке жеткирди. Буга 70-мүнөттө Марко Асенсио жооп кылып 1 гол жаратканы менен, 2 мүнөт өткөндөн кийин коноктор эсепти 1:4кө айлантып, оюнга чекит койду. Жыйынтыгында жалпы 5:3 эсеби менен жеңишке жетишкен "Аякс" клубу "Реал Мадридди" мелдештен четтетти.

"Реал Мадрид" - "Аякс" 1:4
Голдор: 7-мүнөттө Хаким Зиеш, 18-мүнөттө Давид Нерес, 62-мүнөттө Душан Тадич, 72-мүнөттө Марко Асенсио, 72-мүнөттө Лассе Шёне.

"Боруссия Дортмунд" - "Тоттенхэм"

"Боруссия Дортмунд" - "Тоттенхэм" беттешинин тагдыры алгачкы оюнда эле чечилип калган. "Уэмбли" стадионунда өткөн беттеште "Тоттенхэм" 0:3 эсебинде жеңишке жетишти. Мындай жеңилүүдөн кийин "Дортмунддун" берилген күйөрмандары гана германиялык клубдун кийинки баскычына өтөрүнө ишенсе, көпчүлүк футбол сүйүүчүлөрү "Тоттенхэмдин" чейрек финалга өтөрүнө моюн сунуп калышкан.

Көпчүлүк футбол эксперттери "Сигнал Идуна Парк" стадионунда өткөн беттеште "Боруссия" минималдык айырма менен жеңишке жеткени менен, кийинки этапка англиялык клуб өтөрүн болжолдошкон. Бирок жооптук беттеште да талаа ээлери утулуп калышты. "Боруссия" оюндун башынан аягына чейин активдүү оюн көрсөтсө да дарбазачы Уго Льорис баштаган коноктордун мыкты коргонуусун жиреп өтө алган жок. Оюндагы жападан жалгыз голду 48-мүнөттө чабуулчу Харри Кейн жаратты. Ал коргоочулардын борбордук бөлүктөгү катачылыгынан пайдаланган Мусса Сиссоконун чыгарып берген пасын таамай дарбазага багыттады. Беттеш дал ушул эсеп менен жыйынтыкталып, жалпы 0:4 эсеби менен жеңишке жеткен англиялык клуб чейрек финалга жолдомо алды.

"Боруссия Дортмунд" - "Тоттенхэм" 0:1
Голдор: 48-мүнөттө Харри Кейн