Гүлнора Каримова үй камагында экенине карабай Дубайга барып келген деп камакка алынды

Өзбекстандын биринчи президенти Ислам Каримовдун улуу кызы Гүлнора Каримова Ташкентте камакка алынды. Бул тууралуу орусиялык басылмалар республиканын Башкы прокуратурасына шилтеме берүү менен жазып чыгышты.

Маалыматка ылайык, 2017-жылы декабрь айында 10 жылга эркинен ажыратылган Каримованын жаза өтөө мөөнөтү 5 жылга кыскартылган. Ага алыска чыгууга, уюлдук телефон жана социалдык тармактарды колдонууга тыюу салынган. Жергиликтүү бийлик Каримованы жаза өтөөдөгү тартипти бузгандыгы үчүн камакка алды. Ал Ташкентте кармалып камакка алынган.

Гүлнора Каримованын кызы Иман да социалдык тармактагы баракчасына: "Болжол менен саат 19:00 чамасында Башкы прокуратуранын кызматкерлери батириме кирип келишип, 2018-жылдын июнь айынан бери мени менен жашап жаткан апамды алып кетишти. Алар алгач бийликтин атынан коркутуп, кийин батирге дагы башка кызматкерлер келип, апамды сүйрөп чыгып белгисиз тарапка алып кетишти", - деп жазган.

Жергиликтүү басылмалар билдиргендей, Каримова соттун өкүмү күчүнө киргенден кийин, тагыраагы, 2018-жылдын октябрь айында Дубайга учуп кеткен.

Эскерте кетсек, Гүлнора Каримовага уюшкан кылмыштуулук боюнча кылмыш иши козголуп, үй камагына алынган.