Нурсултан Назарбаев "Айка" тасмасын көргөндөн кийин казак аялдары кыргыз аялдарынан эмнеси менен айырмалана турганын айтты

“Айка” фильминин башкы ролун аткарган казак актрисасы Самал Еслямова кинотасма боюнча Казакстандын президенти Нурсултан Назарбаевдин реакциясы боюнча айтып берди. Бул тууралуу казакстандык басылмалар жазып чыгышты.

“Ал тасманы көргөнүн айтып, мындай иш үчүн ыраазычылык билдирди. Президент Казакстандын эли, өзгөчө апалар үй-бүлөсүн, балдарын таштап, акча табуу үчүн башка мамлекетке кетпей деле койсо болорун айтты. Бул абдан маанилүү”, - дейт актриса.

Орусиялык режиссёр Сергей Дворцевой тарткан "Айка" тасмасында Москва шаарында мыйзамсыз иштеп жүргөн кыргыз кызынын окуясы чагылдырылган. Анда Айка күтүүсүз жерден кош бойлуу болуп, баласын жарыкка алып келет. Жардам берип, каралаша турган адамы болбогондуктан, жаңы төрөлгөн ымыркайын төрөт үйүнө таштап кетет. Бирок энелик сезими ага жай бербей таштап кеткен баласын издейт.