КУУ: "Окуу жайдын дааратканасында кулап жаткан балдар биздин студенттер эмес"

6-мартта интернетке 4 адамдын ажаткананын ичинде жатканы тартылган видео тараган. Интернет колдонуучулары окуя Кыргыз улуттук университетинин юридика факультетинин ажатканасында болгонун, алар спайс чегип алганын жазышкан болчу.

Бүгүн, 7-мартта Кыргыз улуттук университеттин коомчулук менен байланыш бөлүмүнүн жетекчиси Ардак Каныбек уулу SUPER.KG'ге түшүндүрмө берди. Анын айтымында, дааратканада кулап жаткан балдар аталган окуу жайдын студенттери эмес.

"Видеодогу окуя 8-февраль күнү болгон экен. Бирок ал балдар биздин окуу жайга тиешеси жок деп 100 пайыз ишенимдүү айта алабыз. Видеодо деле дааратканага кирип барган мугалимдер "бул биздин балдар эмес" деп айтып жатканы буга далил болуп бере алат. Ошол учурда эле окуу жайга "Тез жардам" кызматы жана милиция чакыртылып териштирүү иштери жүргүзүлгөн. Алардын биздин окуу жайга тиешеси жок экени такталгандан кийин эч кандай маалымат тараткан эмеспиз. Кечээ видеосу чыгып кеткенден улам бүгүн эртең менен ректор өзү тийиштүү адамдардын катышуусунда чогулуш кылып, окуянын чоо-жайын аныктап чыгуу жана түшүндүрүү иштерин жүргүзүү боюнча тапшырма берди. Окуу жай коомдук жай болгондуктан кимдир бирөөнүн ал жакка кирүүсүнө тыюу салынбайт. Ошондуктан алар сырттан келген адамдар болушу мүмкүн", - деди Каныбек уулу.

Бишкек шаардык милициясы да окуяга байланыштуу бүгүн маалымат таратып, ошол учурда балдардын организминен баңгизаты жана алкоголь табылбаганын билдирди. Ал эми өздөрү адамды алсыздандыра турган таблеткаларды ичкенин айтып беришкен.