АКШ Гүлнора Каримованы 865 миллион доллар пара алган деп айыптоодо

АКШда Өзбекстандын биринчи президенти Ислам Каримовдун улуу кызы Гүлнора Каримовага жана орусиялык "МобильдикТелеСистемалары" телекоммуникация компаниясынын Өзбекстандагы өкүлчүлүгүнүн мурдагы директору Бекзод Ахмедовго кылмыш иши козголду.

"РИА Новости" басылмасынын Нью-Йорк шаарынын прокуратурасына таянып жазганына караганда, Каримова өзүнүн кызмат абалынан кыянаттык менен пайдаланып үч телекоммуникациялык компаниядан 865 миллион доллар пара алып, кийин аны АКШнын каржы системи аркылуу адалдаган.

Ошондой эле маалыматта "МобильдикТелеСистемалары" компаниясынан сырткары "Vimpelcom LTD" жана "Telia Company AB" компаниясынан опузалап акча талап кылганы айтылат.

"МобильдикТелеСистемалары" АКШнын Юстиция министрлиги, биржа жана баалуу кагаздар боюнча комиссиясы менен 865 миллион долларды төлөө боюнча келишим түзгөн. 2015-жылдын жаз айларында Юстиция министрлиги Голландиянын прокуратурасы менен бирге Каримованын катыштыгы болгон "Vimpelcom", "МТС" жана "TeliaSonera", "Takilant" компанияларынын ортосунда түзүлгөн келишимдерди териштире турганын билдирген. Мындан улам АКШ Европанын беш өлкөсүнө Гүлнора Каримованын 1 миллиард доллар активдерин тергөө ишине байланыштуу камакка алуу өтүнүчүн жолдогон.

Тергөө ишинде белгилүү болгондой, байланыш компаниялары Өзбекстандын базарына чыгуу укугуна ээ болуу үчүн Каримова менен байланыштагы структураларга ири суммадагы акчаларды берип турган. Бул иштин негизинде "Vimpelcom" компаниясы 2016-жылы 795 миллион доллар төлөгөн", - деп айтылат маалыматта.

Гүлнора Каримовага 2017-жылы декабрь айында уюшкан кылмыштуулук боюнча кылмыш иши козголуп, 10 жылга эркинен ажыратылган. Кийин жаза өтөө мөөнөтү 5 жылга кыскартылып үй камагына алынган. Бирок ал үй камагында экенине карабай Дубайга барып келди деген негизде март айынын башында камакка алынды.