Соң-Көл жайлоосундагы малдар чечек оорусунан эмес, уулуу чөптөн өлгөнү белгилүү болду

13-14-июль күндөрү Нарын облусунун Соң-Көл жайлоосунда туулганына 3-6 ай болгон 91 баш козу чөптөн ууланып өлгөн. Мындан 10-15 күн мурда козу-улактардын ичи көөп, ооздорунан шилекей агып өлгөндүгүн Жумгал районунун тургундары айтышкан. ӨКМ билдиргендей, 24-июлда аймактардагы ветеринардык жана фитосанитардык коопсуздук боюнча инспекциянын кызматкерлери малдарга текшерүү жүргүзүштү. Козу-улактар оттогон жайыттардан шектүү чөптөр алынып келинип, лабораторияга текшерүүгө жөнөтүлгөн. Жыйынтыгында козулардын чөптөн ууланганы белгилүү болду. Аталган жайлоодогу малдар бүгүнкү күнгө карата жугуштуу шарп, чечек жана башка ылаңдардан таза. Эске салсак, 24-июлда аталган жайлоодогу малда чечек оорусу катталганы, ушул эле күнү Нарын районундагы ветеринар адистерден турган топ Соң-Көл жайлоосундагы малды текшерүүгө алууга жана ооруган малды дарылоого жөнөп кетишкени айтылган эле.