Мушкер Азат Үсөналиев Финляндияда өткөн эл аралык мелдештен олжолуу кайтты

Мушкер Азат Үсөналиев Финляндияда өткөн эл аралык мелдеште жеңүүчү аталды. Бул тууралуу Кыргыз Республикасынын бокс федерациясынан билдиришти.

Маалыматка ылайык, "Gee Bee 2019" мелдеши 7-10-март аралыгында Хельсинки шаарында өтүп, ага Кыргыз жергесинен 6 мушкер катышкан.

9-мартта Үсөналиев 52 килограммга чейинки салмак ченинде өзүнүн алгачкы Индиядан келген атаандашын 4:1 эсебинде жеңип алган. Ал эми 10-мартта орун алган финалдык беттеште мушкер казакстандык атаандашын жеңип, алтын медаль тагынган.

Эскерте кетсек, Азат Үсөналиев 24-февралда Бишкек шаарында өткөн Советтер Союзунун баатыры Дүйшөнкул Шопоковдун жаркын элесине арналган бокс боюнча эл аралык мелдеште да жеңүүчү аталган.