"Кырк чоро" коомдук бирикмеси "Бишкек феминисттик демилгелер" аталышындагы жүрүшкө уруксат берилишине нааразы болуп мэрдин отставкасын талап кылды

"Кырк чоро" коомдук бирикмеси 8-марттагы "Бишкек феминисттик демилгелер" аталышындагы жүрүшкө уруксат берилишине нааразы болуп, бүгүн, 11-мартта мэриянын алдына чыгышты. Алар аталган жүрүшкө уруксат берген жооптуу кызматкерлердин жана шаар мэри Азиз Суракматовдун отставкага кетишин талап кылышмакчы. Буга чейин "Кырк чоро" бирикмесинин лидери Замирбек Көчөрбаевдин SUPER.KG порталына билдиргенине караганда, алар расмий митингге 13-марттан баштап чыгышат.

"Анткени 11-мартта митинг кылууга уруксатыбыз жок. Ошол себептен мэриянын алдына барып, атайын 150-200 адам менен билдирүү беребиз. Эмне үчүн мэрия 8-мартта "Бишкек феминисттик демилгелер" кыймылынын жүрүшүнө уруксат берет? Алар аялдардын укугун коргойбуз дешип, ЛГБТ коомчулугунун да жүрүшүн өткөрүштү", - дейт Көчөрбаев.