Жогорку Кеңештин тармактык комитетинде калктын органикалык айыл чарба азыгына болгон керектөөсүн жана экспортту жогорулатуу маселеси каралды

Бүгүн, 11-мартта Жогорку Кеңештин Агрардык саясат, суу ресурстары, экология жана регионалдык өнүктүрүү боюнча комитетинин жыйыны өтүп жатат. Анда "Кыргыз Республикасындагы органикалык айыл чарба өндүрүшү жөнүндө" мыйзам долбоору 3-окууда каралды.

Мыйзам долбоору боюнча комитет жыйынында айыл чарба, тамак-аш өнөр жайы жана мелиорация министринин орун басары Жаныбек Керималиев баяндама жасады.

"Мыйзам долбоору органикалык айыл чарба азыгын өндүрүү шарттарын түзүү максатында иштелип чыкты. Ошондой эле калктын органикалык айыл чарба азыгына болгон керектөөсүн жана экспортту жогорулатууга багытталган. Эгерде аталган мыйзам долбоору кабыл алынып, ишке кирсе дыйкандар үчүн органикалык айыл чарба продукцияларын өндүрүүгө жакшы шарт түзүлөт", - деди Керималиев.

Аталган комитеттин төрагасы Айтмамат Назаров мыйзам долбоорун 3-окууда кароодо редакциялык мүнөздөгү гана түзөтүүлөр караларын баса белгилеп, башка түзөтүүлөрдү киргизүүгө тиешелүү мыйзам жол бербестигин белгиледи.

Жыйынтыгында комитет мүчөлөрү мыйзам долбоорун 3-окууда жактыруу чечимин кабыл алышты.