Компьютерде иштегиси келбейт, бир кагазды табуу үчүн бир нече күн коротушат... Өлкөдөгү сотторго карата айтылган сындар

"Өлкөдөгү судьялардын көпчүлүгү компьютерде иштегиси келбейт, кагаз, калемге көңүп калышкан, - деп бүгүн, 11-мартта Бишкек шаарында Кыргыз Республикасынын судьяларынын 11-курултайында өлкө башчы Сооронбай Жээнбеков айтты.

“Соттордун архиви кагаз түрүндө. Керектүү кагазды табуу үчүн бир нече күн убакыт сарпталат, журналдарды барактап табуу керек. Иштерди кароо да кагаз түрүндө гана жүрөт. Каттоо кызматына мүлктү камакка алуу жөнүндө же Ички иштер министрлигине күбөлөрдүн сот процессине келишин камсыз кылуу жөнүндө суроо-талаптардын баары кагаз жүзүндө даярдалат. Кээде кат алмашуулар жарым жылдап жүрөт. Демек, сот процесси да жылдап жүрүп, мөөнөттөрү бузулат.

Мунун баарын электрондук форматта жасоонун эч кандай татаалдыгы жок. Санариптештирүүнү тездетүү үчүн биринчи кезекте судьялар өзгөрүшү абзел. Биздин судьялардын көпчүлүгү компьютерде иштегиси келбейт, кагаз калемге көңүп калышкан. Илгерки замандагы адаты менен жардамчыларына, катчыларына жаздырышат.

Мезгил талабына ылайык, бизге “санариптик судьялар” керек. Компьютердик сабат – судьялардын кесиптик компетенттүүлүгүнүн керектүү бөлүгү болуп калышы зарыл. Бул тез арада жасала турган иш, биз кечигип жатабыз”, - деди президент.