Бүгүн Жогорку Кеңештин тармактык комитети Бишкекте "Коопсуз шаар" долбоорун ишке ашыруу тууралуу көчмө жыйын өткөрөт

Бүгүн, 12-мартта Жогорку Кеңештин Транспорт, коммуникациялар, архитектура жана курулуш боюнча комитетинин көчмө жыйыны өтөт. Бул тууралуу парламенттин расмий сайтына жарыяланды.

Жыйында ИИМдин жол кыймылынын коопсуздугун камсыздоо башкы башкармалыгынын башчысынын милдетин аткаруучу Ыманалы Саркулов "Коопсуз шаар" долбоорунун алкагында аткарылып жаткан иштер тууралуу баяндама жасайт.

Буга чейин Бишкектеги унаа жолдордун кесилишине орнотулган камералар жол кыймылына байланыштуу 7 эреже бузууну каттоого алары маалым болгон.

Алар:

1. Жол чырактын кызыл белгиси күйүп турганда өтүп кетүү;

2. Каршы тилке менен жүрүү;

3. Тротуар, веложол, газон жана жөө адамдар өтүүчү чийимдер менен жүрүү;

4. Жол чырактын кызылы күйгөн учурда стоп сызыгынан өтүп кетүү;

5. Жөө адамдар өтүүчү сызыктан эреже бузуу;

6. Ылдамдыктан ашырып айдоо;

7. Аялдама жана унаа токтоочу жайда эреже бузуу;

Бүгүнкү күндө Бишкекте 20га жакын көчөнүн кесилишине камералар орнотулган.