Депутат: "Мектеп окуучулары клей жыттап кумар алышат экен. Буга тиешелүү чараларды көрүү керек"

Бүгүн, 13-мартта Жогорку Кеңештин жалпы жыйыны өтүп жатат. Анда "Коомдук саламаттыкты сактоо жөнүндө" Кыргыз Республикасынын Мыйзамына өзгөртүүлөрдү киргизүү тууралуу" мыйзам долбоору каралып, 3-окууда добуш берүүгө жөнөтүлдү.

Талкуу учурунда депутат Дастанбек Жумабеков мектеп окуучуларынын арасында кумар алуу үчүн клей жыттагандар көп экенин айтып, тиешелүү чараларды көрүү керек экенин белгиледи.

"Окуучулар базарларда сатылып жаткан "супер клейлерди" алып жыттап жатышыптыр. Өспүрүмдөр ушундай нерселер менен кумар алышат экен. Муну базарларда сатканга тыюу салганга болбойт. Бирок түшүндүрүү иштерин жүргүзүп, сабак боло турган роликтерди чыгарсаӊар. Клейлерди саткан жерлерде өспүрүмдөргө сатпагыла дегендей иш-чараларды жүргүзүү керек. Мунун алдын алуу зарыл. Келечекте клей жыттаган модага айланып кетиши мүмкүн. Жаштар жаман нерсеге бат ооп кетет. Айрыкча мектеп окуучуларынын арасында көп экен. Алардын ден соолугуна терс таасирин тийгизип жатат", - деди эл өкүлү.

Саламаттыкты сактоо министринин орун басары Мадамин Каратаев депутат айткан сунуш эске алынарын айтып, клей жыттоонун зыяндуу жагын чагылдырган атайын видеоролик даярдаларын билдирди.