Ошто унаа уурдоого шектелип 20 жаштагы жаран кармалды

Ош шаарында унаа уурдоого шектелип 20 жаштагы жаран кармалды. Бул тууралуу Ош ШИИБинин басма сөз кызматы билдирди.

Маалыматка ылайык, шектүү Ош шаарынын Алмалык айылынын тургуну болгон. Ал мурда дагы ушундай кылмыш менен Жалал-Абад шаарында кармалып, жазага тартылган.

"6-марттан 7-мартка караган түнү Ош шаарынын тургуну эртең менен Мерседес үлгүсүндөгү унаасын токтотуп койгон жеринен таппай калып, милицияга арыз жазган. Иликтөө иштеринин натыйжасында 7-мартта унаа Ош шаарынын четинен табылган. Ошол эле күнү кечинде Ош шаарынын ооруканаларынын биринде дарыланып жаткан жеринен шектүү Т.Б. кармалган. Алгачкы тергѳѳнүн маалыматтарына караганда, шектүү ооруканалардын биринде дарыланып жатып, өз алдынча чыгып кеткен. Ал ичимдик ичип, мас абалында аталган унаанын эшигин ачып машинаны айдап кеткен. Андан соң унааны шаардын четине таштап, эртең менен ооруканага келип ордуна жатып калган. Учурда бул иш боюнча тергөө иштери уланып, шектүү убактылуу кармоочу жайына киргизилди", - деп билдирет басма сөз кызматы.