4-марттан бери жол эрежесин бузуу боюнча 12 миң 734 токтом иштелип чыкты

4-марттан бери жол эрежесин бузуу жөнүндө 12 миң 734 токтом иштелип чыгып, 5 миң 686сы унаа ээсинин дарегине жеткирүү үчүн "Кыргыз почтасына" өткөрүлүп берилди. Бул тууралуу "Коопсуз шаар" долбоорунун экинчи фазасын ишке ашырууга даярдык көрүү маселеси боюнча өкмөт башчы Мухаммедкалый Абылгазиев өткөргөн кеңешмеде айтылды.

Жол кыймылынын коопсуздугун камсыздоо боюнча башкы башкармалыгынын жетекчисинин орун басары Ыманалы Саркулов "Кыргыз почтасы" токтомдорду унаа ээлерине жеткирип баштаганын жана жол кырсыктарынын саны азайганы байкалып жатканын белгиледи.

"Унаа айдоочулар арасында кошумча түшүндүрүү иштери жүргүзүлүүдө. "Коопсуз шаар" долбоорунун алкагында жаралган бардык юридикалык маселелер боюнча жарандарды кабыл алуу жүрүүдө. "Кыргыз почтасы" жол эрежелерин бузуулар жөнүндө токтомдорду жеткире баштады. Ошону менен бирге марттын башынан бери жолдордо жол кырсыктарынын азайышы, ошону менен бирге өлүмдүн саны азайганы байкалууда. Жол кыймылынын катышуучулары жол эрежелерин сактай башташты", - деди ал.

Андан кийин Маалыматтык технологиялар жана байланыш мамлекеттик комитетинин төрагасы Бакыт Шаршембиев маалымат берди. Ал долбоордун экинчи фазасын ишке киргизүүнүн кечигүүсү инженердик түйүндөргө аппараттык-программалык комплекстерди кошуу үчүн уруксат кагаздарын макулдашуунун создуктурулушу менен байланыштырды. Бирок учурда келип чыккан маселелер чечилгенин айтты.

Мухаммедкалый Абылгазиев долбоорду жүзөгө ашыруу өкмөттүн ишинин башкы артыкчылыктарынын бири экенин белгилеп, долбоордун экинчи баскычын ишке киргизүүгө даярдык көрүү боюнча бир катар тапшырмаларды берди.