Чемпиондор Лигасы: "Барселона" - "Манчестер Юнайтед", "Тоттенхэм" - "Манчестер Сити". Чейрек финалда беттеше турган жуптар аныкталды

Бүгүн, 15-мартта Швейцариянын Ньон шаарында Чемпиондор Лигасынын чейрек финалына өткөн командалардын арасында чүчү кулак ташталды.

Чүчү кулактын жыйынтыгы менен төмөнкү жуптардын беттеши орун ала тургандыгы белгилүү болду:

"Аякс" (Голландия) – "Ювентус" (Италия)
"Ливерпуль" (Англия) – "Порту" (Португалия)
"Тоттенхэм" (Англия) – "Манчестер Сити" (Англия)
"Барселона" (Испания) – "Манчестер Юнайтед" (Англия)

Аталган жуптар өз үйүндө жана конокто беттеш өткөрүп, 2 оюндун жалпы жыйынтыгы менен жеңүүчү болгон команда кийинки этапка өтөт. Алгачкы беттештер 9-10-апрелде, жооптук беттештер 16-17-апрелде орун алат.

Мелдештин финалы 1-июнь күнү, Мадрид шаарындагы "Ванда Метрополитано" стадионунда өтөт.

Буга чейин, айрым маалымат булактары УЭФАнын директору чүчү кулактын жыйынтыгын алдын ала жарыялап алып, кайра интернет бетинен өчүрүп салганын жазышкан. Андагы маалыматка ылайык, мелдештин чейрек финалында "Ливерпуль" – "Аякс", "Ювентус" – "Порту", "Манчестер Юнайтед" - "Тоттенхэм", "Барселона" - "Манчестер Сити" командалары беттешмек.