"Электр энергиясынын тарифи жана милдеттүү медициналык камсыздандыруу фонду жөнүндө" коомдук угуу өттү

Кечээ, 15-мартта "Электр энергиясынын тарифи жана милдеттүү медициналык камсыздандыруу фонду жөнүндө" коомдук угуу өттү. Бул тууралуу Жогорку Кеңештин басма сөз кызматы билдирди.

Анда депутат Аида Исмаилова Токмок шаарынын тургундарына Жогорку Кеӊештеги ишмердүүлүгү тууралуу учкай маалымат берди. Эл өкүлү электр энергиясына болгон тарифтин кымбаттыгы, айрыкча, кыш мезгилинде жер-жерлердеги шайлоочуларга бир топ түйшүк жаратары боюнча жолугушууларда нааразычылыктар байма-бай айтыларын, анын негизинде өкмөттүн астына тарифти ылдыйлатуу талабын коюп келе жаткандыгын айтып берди. Ошону менен катар Саламаттыкты сактоо министрлигинин алдындагы Милдеттүү медициналык камсыздандыруу фондусундагы мыйзамсыз иш-аракеттер боюнча кеп кылды.

Иш-чаранын жүрүшүндө шаардык оорукана жетекчилери прокуратура, монополияга каршы агенттик сыяктуу мекемелерден келген текшерүүлөр көп болуп жаткандыктан, ырааттуу иштөөгө мүмкүнчүлүк болбой жатканын билдиришти. Алар мындай иштин аягында бейтаптар жабыр тартышат деген пикирлерин айтышты.

Ал эми "Жакшылык" кайрымдуулук фондунун жетекчиси Рахман Исаев шаарда аутизм, даун синдрому сыяктуу оорулар менен төрөлгөн балдардын саны барган сайын көбөйүп баратканын айтып, аларга медициналык кызмат көрсөтүүлөр боюнча шарттарды жакшыртуу зарылдыгын белгиледи. Ошондой эле мындай балдардын ден соолугун жакшыртууда сууда сүзүү көп жардам берерин айтып, шаарга бассейн куруу, жайында Ысык-Көлгө жолдомо маселелеринен көмөк көрсөтүүнү эл өкүлүнөн өтүндү.