Камчыбек Ташиев: "Эмне үчүн бийлик өзүбүздүн аймагыбызга жол куруу үчүн Тажикстандан уруксат сурашы керек?"

Экс-депутат Камчыбек Ташиев 14-март күнү социалдык тармактагы баракчасына Кыргыз-Тажик чек арасындагы чыр боюнча жеринен таанышып келүү үчүн Баткенге жөнөп жатканын жазган.

"Мен Баткенге жөнөп жатам, бийликтегилер мурдагыларга окшоп эле эч нерсе чече алышпайт. Жер, эл бизге керек, менин, сенин урпактарыңа керек! Ата-бабалардын жерине кол тийгизбейбиз", - деп жазган Ташиев.

Бүгүн, 19-мартта Бишкек шаарында саясатчы Баткенге болгон сапары тууралуу маалымат жыйынын өткөрдү. Ташиев белгилегендей, бийлик өкүлдөрү Кыргыз-Тажик чек арасы боюнча түзүлгөн жаңы протоколдун мазмунун элден жашырып жатат.

"Кыргыз бийлиги 2 тараптуу сүйлөшүүлөрдүн жыйынтыгын коомчулукка ачык жарыялаган жок. Буга байланыштуу кол коюлган протоколдордо эмне деп жазылганын толук билген жокпуз. "Ак-Таш-Тамдык жолун курууга уруксат алдык" деген сыяктуу айрым гана маалыматтар ачыкталды. Мындан улам суроо жаралат. Эмне үчүн бийлик кыргыз аймагына жол куруу үчүн Тажикстандан уруксат алышы керек? Протоколго бул маселени киргизбеш керек болчу. Анткени жол курууда тажик бийлиги менен макулдашуу, бул аталган аймактар Тажикстандын аймагы экендигин моюнга алуу менен барабар.

Тажик бийлиги 2 тарап макулдашкан бардык маселелерди ачык жарыялап жатат. А биздикилер баарын жаап-жашырып жатышат. Ошондуктан биз бийлик өкүлдөрүнөн бардык маалыматтарды ачык-айкын коомго жеткиришин талап кылышыбыз керек", - деди Ташиев.