Миграция кызматынын өкүлү Якутиянын ички иштер министри менен жолугушуп абалды талкуулады

Бүгүн, 19-мартта Кыргыз өлкөсүнүн Миграция кызматынын жетекчисинин орун басары Самат Токтоболотов Саха Республикасынын (Якутия) ички иштер министри Владимир Прокопенко менен жолугушканын Орусиядагы элчиликтин маалымат кызматы кабарлады.

Жолугушууга эки тарап жергиликтүү элдин Кыргыз жарандарына карата ачуулануусу боюнча кырдаалды жөнгө салууну талкуулашты.

Белгилүү болгондой Токтоболотов Якутск шаарындагы Кыргыз жарандарынын коопсуздугун камсыз кылуу боюнча иш-чараларды күчөтүү өтүнүчүн келтирген. Прокопенко өткөн сутка ичинде Кыргыз жарандарына байланыштуу окуя тууралуу кайрылуу болбогонун, Саха Республикасынын Ички иштер министрлиги баш аламандыкка жол бербөө боюнча чараларды көрүүгө даяр экенин айткан.

Жыйынтыгында Якутск шаарындагы абалды нормалдаштыруу максатында коомчулукка түшүндүрүү иштерин биргеликте жүргүзүүнү макулдашышты.

17-март күнү кечинде Якутск шаарынын 200дөй тургуну Борбор Азиядан келген мигранттарга каршы митингге чыгышкан. Буга жергиликтүү тургундун ошол күнү эртең менен Борбор Азиядан келген 3 адам аны күч колдонуу менен унаага салып кетип зордуктаганын айткан маалыматы түрткү болгон.

Якутск шаарынын тергөө кызматы зордуктоо фактысы болгонун тастыктап, шектүү катары кармалгандардын бири Кыргыз жеринен барган адам экенин жана күнөөсүн моюнуна алганын кабарлаган. Ал эми дагы 2 адам кылмыш ишине тиешеси бар же жогу аныкталып жатканы айтылган.

Учурда расмий маалыматтар боюнча Орусиянын аймагында 640 миңдей Кыргыз жараны бар болсо, анын 10 миңден ашыгы Саха Республикасынын аймагында иштеп жүрүшөт.