Миграция кызматынын өкүлдөрү Якутск шаарында зордуктоого шектелип кармалган Кыргыз жараны менен жолугушту

Миграция кызматынын жетекчисинин орун басары Самат Токтоболотов 19-мартта Якутск шаарында зордуктоого шектелип кармалган 24 жаштагы Кыргыз жараны Ж.К.уулу. менен жолугушту. Бул тууралуу миграция кызматынын басма сөз кызматы кабарлады.

Маалым болгондой, Ж.К.уулу убактылуу кармоочу жайда ага эч ким кысым көрсөтпөгөнүн билдирген. Учурда ага жактоочу, котормочу берилди.

17-март күнү кечинде Якутск шаарынын 200дөй тургуну Борбор Азиядан келген мигранттарга каршы митингге чыгышкан. Буга жергиликтүү тургунду Борбор Азиядан келген 3 адам күч колдонуу менен унаага салып кетип зордуктаганы тууралуу маалымат түрткү болгон.

Якутск шаарынын тергөө кызматы зордуктоо фактысы болгонун тастыктап, шектүү катары кармалгандардын ичинен Ж.К.уулу күнөөсүн моюнуна алганын кабарлаган. Андан кийин шектүү шаардык соттун чечими менен камакка алынган. Ал эми дагы 2 адам кылмыш ишине тиешеси бар же жогу аныкталып жатканы айтылган.

Учурда расмий маалыматтар боюнча Орусиянын аймагында 640 миңдей Кыргыз жараны бар болсо, анын 10 миңден ашыгы Саха Республикасынын аймагында иштеп жүрүшөт.