"Нур Отан": "Астананы Нурсултан деп өзгөртүү чечими кабыл алынды"

Астана шаарын Нурсултан деп өзгөртүү чечими кабыл алынды. Бул тууралуу "Нур Отан" партиясынын төрагасынын орун басары Маулен Ашимбаев 20-мартта Казакстандын жаңы президенти болуп ишин баштаган Касым-Жомарт Токаевдин сунушуна түшүндүрмө берип жатып билдирди. Ашимбаев бул чечим менен казакстандыктарды куттуктай турганын айтты.

"Бул чечим туура жана салмактуу - Астанага канчалык күч-аракет жана энергия жумшалды. Касым-Жомарт Кемелевичтин чечими өтө туура жана мыйзамдуу. Биз аны колдойбуз жана шаардын атын өзгөртүү чечими менен астаналыктарды жана бүткүл казакстандыктарды куттуктайбыз", - деди Ашимбаев.

Жаңыдан гана президент болуп ишин баштаган Касым-Жомарт Токаев парламентте ант берүү аземинен кийин сүйлөп жатып Астана шаарын Нурсултан деп өзгөртүү сунушун айткан.

"Нурсултан Абишевич Назарбаевдин ысымын түбөлүккө калтырышыбыз керек. Борборубуз Нурсултан деп биздин президенттин атын алып жүрүшү зарыл деп эсептейм. Эсиңиздерге сала кетейин, мындай демилге буга чейин парламент депутаттары тарабынан көтөрүлгөн", - деген Токаев.

Андан сырткары өлкөнүн борбор калаасына Назарбаевдин монументин тургузууну жана облустардагы борбордук көчөлөргө анын атын берүү керектигин кошумчалаган.

Казакстандын мурдагы президенти Нурсултан Назарбаев 19-мартта казак элине атайын кайрылуу жасап, өзү президент катары ыйгарым укуктарын токтотконун жарыялаган.