Жол кыймылынын коопсуздугун камсыздоо башкы башкармалыгынын жетекчиси болуп Азамат Исраилов дайындалды

ИИМдин Жол кыймылынын коопсуздугун камсыздоо башкы башкармалыгынын жетекчиси болуп Азамат Исраилов дайындалды. Бул тууралуу аталган мекеменин басма сөз кызматы кабарлады. Тийиштүү буйрукка өкмөт башчысы Мухаммедкалый Абылгазиев кол коюп, Исраилов 20-мартта өздүк курамга тааныштырылды.

Аталган кызматты буга чейин Канат Жумагазиев жетектеп келип, февраль айынын башында ал Бишкек ШИИББинин башчысы болуп дайындалган.

Азамат Исраилов 1973-жылы Ысык-Көл облусунун Түп районунда туулган. Ал ИИМдин Академиясында юриспруденция адистиги боюнча билим алгандан кийин, тактап айтканда, 1999-жылдан тартып ички иштер органдарында иштеп баштаган. 2007-жылдан тартып 2016-жылга чейин жол коопсуздугу боюнча Ысык-Көл облусундагы райондук жана облустук бөлүмдөрдү жетектеп келген. 2017-2019-жылдары ИИМдин Жол кыймылынын коопсуздугун камсыздоо башкы башкармалыгында бөлүм башчы болуп иштеген.