Шашылыш билдирүү! 23-мартка чейин өлкө аймагында туруксуз аба ырайы күтүлөт, тоолуу райондордо кар көчкү түшүүсү мүмкүн

23-мартка чейин өлкө аймагында туруксуз аба ырайы күтүлөт. Тоолуу райондордо кар көчкү түшүүсү мүмкүн. Бул тууралуу ӨКМнын басма сөз кызматы билдирди.

"20-21-мартта Ош, Жалал-Абад, Баткен, Нарын облустарынын көпчүлүк аймактарында жаан жаап, тоолуу райондордо кар жаашы күтүлөт. 22-мартта жаан-чачын күтүлбөйт. 23-мартта Чүй, Талас, Ош, Жалал-Абад, Баткен облустарынын көпчүлүк аймактарында, Ысык-Көл, Нарын облустарынын кээ бир райондорунда жамгыр жаап, тоолуу райондорунда кар жаашы күтүлөт.

Мындай туруксуз аба ырайы айыл чарба иштерин, автоунаа, энергетика жана коммуналдык кызматтардын ишин жана жайыттарда малды кармоону кыйындатат. Ош, Жалал-Абад жана Баткен облустарында дарыялардагы суунун деңгээли кескин көтөрүлүшү мүмкүн", - деп айтылат маалыматта.