2 жаштагы Ибрагимге кордук көрсөткөнү үчүн 15 жылга соттолгон аял: "Абакта тамак-аш, кийимден кыйналган жокмун. Болгону кыздарымды сагынам"

2015-жылдын 11-январына караган түнү шаардагы балдар ооруканасына 2 жашар бала оор абалда жеткирилген. Анын денесинде көптөгөн жаракаттар болгон. Соттук-медициналык экспертиза анын зордукталганын аныктаган. Күч органдары тарабынан бул кылмышка шектүү катары баланын атасынын 47 жаштагы бир тууган агасы Жаныбек Т. жана анын аялы Айзада А. эки айга камакка алынган. 2017-жылдын 28-февралында ишти Аламүдүн райондук соту карап, Жаныбек Т.ны өмүр бою, Айзада А.ны 15 жылга эркинен ажыраткан. Ал эми Ибрагим 2 айга чукул убакыт эсине келе албай комада жатып 2015-жылдын май айынын башында үйүнө чыгарылган.

Жазаларды аткаруу мамлекеттик кызматынын №2 аялдар абагында жазасын өтөп жаткан Айзада А. бул окуя боюнча өзүнүн версиясын SUPER.KG порталына айтып берди.

"Жолдошум экөөбүзгө козголгон кылмыш иши боюнча соттук отурум жабык эшик артында өткөн. Сот бир тараптуу карап койгон. Мындан улам күйөөм өмүр бою эркинен ажыратылып, мага 15 жыл берилген. Мен ошол убакта сот ачык болушун, журналисттер аркылуу коомчулук бул окуянын кандай болгонун көрүшүн каалагам. Биз жалган жалаа менен гана соттолуп кеттик. Эми өзүңөр деле ойлоп көргүлөчү, жолдошум өзүнүн бир тууган инисинин баласын кантип зордуктайт? Бизге ким тарабынан мындай жалаа жабылды билбей деле калдым. Ошол окуядан кийин чындык бар экенине көзүм жетпей калды", - дейт ал.

Жолдошу экөө камакка алынганда кыздарынын улуусу 17 жашта, ал эми кичүүсү 5 жашта калган.

"5 кызым өз алдынча тиричилик кылып өсүп келе жатышат. Биз камакка алынгандан кийин аларды кайнагам карамак болгон. Бирок алар кандай тарбия көрүп, эмне жеп чоңоюп жатышканын билбейм да. Алар ата-энеси аман туруп тирүүлөй жетим калбадыбы. Алардын убалы эми кимге? Менин абакта отурганыма 4 жыл болду. Абакта азыр вахтада иштейм. Бул жакта тамак-аштан, кийим-кечеден өксүгөн жокпуз. Болгону балдарыбызды сагынып жүдөдүк. Алар мага жолугушууга келип турушат. Ал эми Ибрагим жөнүндө кабарым жок. Эки жыл мурун кыздарым Ибрагимди көрөлү деп барышса жолуктурбай коюшкан экен. Андан бери анын каякта экенин да билбейбиз", - дейт.

Кайгылуу окуяны башынан өткөргөн Ибрагим учурда 6 жашта. Аны экинчи апасы Диана Сайимова карап келет. Биздин сайтка берген маегинде ал Ибрагим тууралуу буларды айтып бергени бар.

"Балам токмоктолуп, ооруканага жатып калгандан бери оор абалда. Азыр шал оорусу менен жабыркайт. Баш мээси өспөй калган. Ооруканадан чыккан учурдан тартып колдорун, буттарын кыймылдатып, бир аз ойнойт. Бирок өз алдынча отура албайт. Канчалык аракет кылганы менен сүйлөй албайт. Мындан улам баланы айыктыруу үчүн 2015-жылдан бери чет өлкөдөгү реабилитациялык борборлор менен сүйлөшүп, кайсы жерден дарыласа жардам бере турганын караштырып келебиз", - деген Сайимова.