№2 абакта 2 жаштагы баласы менен жаза мөөнөтүн өтөп жаткан келиндин кыялы

Жазаларды аткаруу мамлекеттик кызматынын №2 аялдар абагында учурда 8 аял 3 жашка толо элек балдары менен жазаларын өтөшүүдө. Ал эми 3 жашка толгондон кийин бала соттолуучунун жакындарына же болбосо балдар үйүнө өткөрүлүп берилет.

Бул абакта балдар үчүн бардык мүмкүнчүлүктөр түзүлгөн. Мисалы, оюн аянтчасы, бөлмөлөрдө балдарга керектүү буюмдар жана оюнчуктар бар. Атын атагысы келбеген келин 2 жаш 8 айлык кызы менен аталган жайда жазасын өтөп жатат. Ал бизге абактагы жашоосу тууралуу бөлүштү.

"Мен 8 жылга эркиндигимден ажыратылгам. Өзүмдүн 2 балам бар, бири 8 жашта, ал эми кызым менин жанымда. Жолдошум жок. Мен камакка алынгандан кийин СИЗО-1де төрөгөм. Кызым төрөлгөндөн кийин эки күндөн кийин эле соттук отурум башталды. СИЗО-1де бул жактагыдай шарт жок. Бир камерада кээде 12 адамга чейин жашачубуз. Киши көп болгондуктан таза аба да жок. Ар ким каалаган убагында чылым чегет. Ал эми биз бул жакта бөлмө ичинде тамеки чекпейбиз. Балдарыбыздын ден соолугун ойлойбуз. Чогуу жашагандар ынтымактуубуз. Балдарыбызды кароо менен убакыт өткөрөбүз.

"Адам сатуу" беренеси менен 2 адам соттолгонбуз. Ага 10 жыл, мага 8 жыл берилген. Шеригим Свердлов РИИБинин мурдагы оперкызматкери болчу. Жаңы кодекс боюнча биздин беренеге 7 жарым жыл берилиши керек экен. Жакында шеригимдин жаза өтөө мөөнөтүн 7 жарым жыл кылып өзгөрттү. Ал эми менин ишим шаардык сотто каралып жаткандыктан жакшы үмүт менен үй камагына чыгуу чечимин күтүп жатам. Биз кармалганда 5 адам болчубуз. Сотто үчөө "жаап-жашыруу" беренеси менен үй камагына бошотулган. Ал эми экөөбүз камалганбыз. Абакта отурганыма апрель айында төрт жыл болот. Жаңы кодекс менен эсептегенде жаза мөөнөтүм бүтүп деле калды. Себеби сот иши аяктагыча 1 жыл СИЗО-1де отурдум. Ал жактагы бир күнүң эки күн болуп эсептелет", - дейт ал өз сөзүндө.

Ошондой эле эркиндикке чыксам балдарымды багып, аларга татыктуу тарбия берип чоңойтом деп кыялданат.