Орусияда жүргөн Кыргыз жарандарына миграциялык мунапыс жарыялоо чечими кабыл алынды

Орусиянын аймагында жүргөн Кыргыз жарандарына миграциялык мунапыс жарыялоо чечими кабыл алынды. Мындай маалыматты Кыргыз өлкөсүнүн Орусиядагы элчилигинен кабарлашты.

Маалым болгондой, мындай чечим Орусия президенти Владимир Путиндин Кыргыз жерине жасалчу расмий иш сапарына карата жана мамлекет башчылардын деңгээлинде жетишилген келишимдерди ишке ашыруунун алкагында кабыл алынды.

"Мунапыс мезгилинде миграциялык мыйзам бузуулары менен жүргөн жарандар 22-апрелге чейин эч кандай тоскоолдуксуз чыгууга жана кайра каалаган учурда административдик жоопко тартылбастан кирүүгө болот. Бул маалымат 21-мартта элчиликтин делегациясы менен Орусиянын ИИМинин миграция маселеси боюнча башкы башкармалыгынын жетекчиси Валентина Казакова менен жолугушууда берилди", - деп кабарлашты элчиликтен.

Элчилик миграциялык майда мыйзам бузуулары бар жарандарды жогоруда белгиленген мүмкүнчүлүктөн пайдаланып алууга чакырат.

Толук маалымат алуу үчүн элчиликтин + 925 103 29 11 номуруна чалсаңыздар болот.