Оштогу "Ак жүрөк" кризистик борбору: "Балдарымдан кордук көрдүм деп 80 жаштагы эне келди"

Ош шаарындагы "Ак жүрөк" кризистик борборунда жардам алып жаткандардын бири - 80 жашка таяп калган эне. Маалыматты аталган борбордун директору Дарика Асилбековага байланышканыбызда тастыктап, учурда психологиялык, медициналык социалдык жардам алып жатканын айтты.

Эненин айтымында, ал өз баласынан кордук көрүп келген, баласы ага кол көтөрөт.

"80ге таяп калган байбиче өлүгүм талаада калабы?" деп муңканат", - дейт Асилбекова. Ал борборго мындан 5-6 күн мурун келген. Реабилитациялык жардам алып бүткөндөн кийин эне кайда барарын өзү тандайт.

"Бул энени өзүнүн айылынан эле бир үй-бүлө багып алабыз деп жатышат. Бирок бизден жардам алып бүткөндөн кийин карылар үйүнө барабы же ал үй-бүлөгө барабы өзү тандайт. Балдарынын бул жакка келгенин көргөн жокмун, бирок укук коргоо органдарына кечирим сурап барганын уктум. Эне өзү балдарымдан алыс эле жашайм, бул биринчи жолу кол көтөрүшү эмес деп жатат", - деди Асилбекова.

Ош ОИИБи факты боюнча маалыматтар топтолуп жатканын, андан кийин билдирүү берилерин айтты.