Ош шаарындагы кооптуу делген май куюучу жайлар жабылат

Ош шаарындагы май куюучу жайлар текшерилип, талаптарга жооп бербегендери жабылат. Бул тууралуу шаар башчысы Таалайбек Сарыбашов май куюучу жайларды текшерүү учурунда билдирген. Мэриянын берген маалыматына караганда, мындан тышкары шаар ичине май куюучу бекеттерди курууга уруксат бербөө боюнча да буйрук чыгарылат.

Калаа башчысы тиешелүү жетекчилерге тапшырма берип, нормага туура келбеген май куюучу жайларга мыйзам боюнча чара колдонулушу керектигин айтты.

“Эң биринчи кезекте элдин коопсуздугун ойлошубуз керек. Ар бир май куюучу жайдын мыйзамдуулугун текшергиле. Май куюучу бекеттер шаардын сыртында деле жетиштүү. Талаптарга жооп бербеген, мыйзамсыз, кооптуу май куюучу жайлардын иши токтотулат. Мындан кийин шаар ичине май куюучу жайларды курууга уруксат бербөө боюнча буйрук чыгарылат”, - деди Сарыбашов.

Ош шаарында жалпы 44 май куюучу жай бар. Анын алтоо иштебей турат.

20-мартта Ош шаарынын Исанов көчөсүндө жайгашкан май куюучу жайдан өрт чыгып, 2 адам жаракат алган.